25.07.2019

Plaid dils uestgs svizzers 2019

29 da settember 2019

 

"Ei setracta buca mo da migrants"

 

Cars frars e caras soras,

«Ei setracta buca mo da migrants»

 

Cun eleger quella tematica pil di dil migrant e dil fugitiv accentuescha Papa Francestg danovamein in’impurtonta direcziun en siu pontificat. Con savens repeta el ses appels en favur da migrants, fugitivs, scatschai ed unfrendas da commerci cun carstgauns! El intimescha nus da parter cun el siu profund quitau per tuts carstgauns che ston viver als urs existenzials. Quel che ha fom, che ha seit, igl jester, quel che ha buca vestgadira, il malsaun, il perschunier, quel che splunta oz vid nies esch ei Jesus sez che damonda da nus ina sentupada ed in agid.

Il messadi da quest onn ei gia neu da siu tetel extraordinaris. Sch’ei setracta buca mo da migrants, sche da tgi lu aunc? Senza resalvas di il messadi clar e bein: Ei setracta da Vus e da mei. Ei setracta da scadin da nus, da nus tuts, da nossas temas e nossas speronzas. Ed ei dat aunc damondas pli profundas. Co fa Dieus a nus curascha ed envida nus? Tgei daventein nus? Tgei sort da societad preparein nus per quels che vegnan a vegnir suenter nus?

Il migrant, il fugitiv ei buca cheu per far tema a nus. Savens denton sveglia el en nus temas zuppadas che meinan sco in reflex a reacziuns. La preschientscha da migrants e fugitivs meina l’egliada naven da nus vi sin auters. Igl ei in appel ed ina intimaziun permanenta da buc emblidar quei che la cardientscha cristiana di: Mintga carstgaun ei in frar. Il migrant sco frar gida mei a capir ed enconuscher meglier memez. Igl evangeli presenta a mi in spieghel el qual jeu vesel memez el frar. Pertgei duess pia il frar far tema a mi? Forsa, sco il messadi dil Papa muossa, “perquei che la preparaziun per quella sentupada maunca. [1]" Sche la preschientscha dil migrant sveglia temas en mei, duessen nus seconfruntar cun ellas e dismetter ellas entras quei che nus setenin vid l’experientscha e la ductrina digl evangeli. Tgi ei quei um che vegn sur l’aua? “Buca tema”, di Jesus, “jeu sun” (Mt 14,27). Sche nus prendein serius ils impuls da Papa Francestg, essan nus sfurzai da veser la damonda dalla migraziun buca sco ina caussa per sesezza e distaccada da nossas ragischs humanas e cristianas. Igl ei impurtont da tractar quella tematica en profunda concordanza cun quei che fa ora nossa cultura e nossa identitad. Il cristian il pli human sco quel che sereferescha sigl evangeli, vegn ad anflar la via els differents aspects digl intent papal ed anflar siu plaz.

Ei setracta buca mo da migrants: Ei setracta da nies esser carstgaun; ei setracta digl entir carstgaun e da tuts carstgauns; aunc dapli: Ei setracta da sclauder negin; ei setracta dalla carezia proximala e da quei da tschentar ils davos al emprem plaz; ei setracta d’ereger il marcau da Diu e dil carstgaun. Scadina part da quei messadi dil Papa fa nus finalmein capir, ch’ei “setracta buca mo dalla caussa dils migrants, mobein da nus tuts, dil present e dil futur dalla famiglia humana [2]". Sche migraziun ei in’enzenna dil temps, stuein nus leger sia muntada endretg, enstagl da mussar cun il det sin migrants, fugitivs e requirents d’asil e far els responsabels per scadin problem che pertucca nossa societad.

A caschun dil di ch’ei dedicaus ad els, vegn il Papa envidar migrants, scatschai e lur organisaziun accumpignontas ad ina speciala celebraziun eucaristica sin la plazza da sogn Pieder. Siu agir savess inspirar nus! Ei fuss in pass impurtont viers ina decisiun d’agir ella glisch digl evangeli. Veramein, igl evangeli muossa a nus Christus denter ils pigns e paupers. Astgan els adina mo ver il dretg sin las brustgas che crodan giu dalla meisa dils rehs (conf. Lc 16,19-21)? Gia en siu emprem scriver ha Papa Francestg exprimiu il giavisch per ina “Baselgia sin via” che capescha “da prender senza tema l’iniziativa da serender viado per encurir quels ch’ein lunsch naven e d’envidar ils marginalisai.” (Evangelii Gaudium, nr. 24).

 

✠ Jean-Marie Lovey

Uestg da Sion

[1] Papa Francestg, Priedi, Sacrofano, 15 da fevrer 2019

[2] Messadi da Papa Francestg pil di mundial dil migrant e dil fugitiv 2019.

   

Plaid uestgs svizzers (115.48 kB)